കിനാലൂരിൽ എയിംസ് പ്രതീക്ഷയോടെ പ്രദേശവാസികൾ

ബാലുശ്ശേരി: കേന്ദ്രസർക്കാർ കേരളത്തിന് എയിംസ് അനുവദിച്ചാൽ കിനാലൂരിൽ സ്ഥാപിക്കുമെന്ന് ആരോഗ്യവകുപ്പ് മന്ത്രി കെ.കെ. ശൈലജ പ്രഖ്യാപിച്ചതോടെ ഏറെ പ്രതീക്ഷയിലാണ് കിനാലൂർ പ്രദേശവാസികൾ.

കിനാലൂർ എസ്റ്റേറ്റിലെ 308 ഏക്കർ സ്ഥലം വ്യവസായവകുപ്പ് ഏറ്റെടുത്ത സന്ദർഭത്തിൽ കിനാലൂരിൽ വലിയ വ്യവസായ സ്ഥാപനങ്ങൾ ആരംഭിക്കുമെന്നായിരുന്നു അന്നത്തെ സർക്കാർ പ്രഖ്യാപിച്ചിരുന്നത്. വർഷം ഇരുപത് കഴിഞ്ഞിട്ടും വലിയ വ്യവസായസ്ഥാപനങ്ങളൊന്നും കിനാലൂരിലെത്തിയില്ല. ഏതാനും ചെറുകിട വ്യവസായസ്ഥാപനങ്ങൾ മാത്രമാണ് ആരംഭിച്ചത്. ഇതുകൊണ്ട് പ്രദേശത്തുകാർക്ക് തൊഴിലോ മറ്റ് നേട്ടങ്ങളോ ഉണ്ടായില്ല.

മെഡിസിറ്റി, ഹോളിസ്റ്റിക് വില്ലേജ് , ഐ.ടി. പാർക്ക്, സോളാർ പാർക്ക് എന്നിവ സ്ഥാപിക്കുന്നതിനായി പലതവണ ഉന്നതോദ്യോഗസ്ഥർ കിനാലൂർ സന്ദർശിച്ച് വിവരങ്ങൾ ശേഖരിച്ചിരുന്നു. എന്നാൽ, വർഷങ്ങൾ കഴിഞ്ഞിട്ടും ഒരു സ്ഥാപനവും കിനാലൂരിലെത്തിയില്ല. സർക്കാർഭൂമി വിവിധ സ്ഥാപനങ്ങൾക്കായി വീതംവെച്ച് നൽകുകയാണുണ്ടായത്.

എയിംസ് കിനാലൂരിൽ സ്ഥാപിക്കുമെന്ന് വർഷങ്ങൾക്കാമുമ്പും പ്രചാരണമുണ്ടായിരുന്നു. എന്നാൽ, ഇത്തവണ വകുപ്പുമന്ത്രിതന്നെ പ്രഖ്യാപിച്ച സ്ഥിതിക്ക് എയിംസ് കിനാലൂരിൽ വരുമെന്ന പ്രതീക്ഷയിലാണ് നാട്ടുകാർ കിനാലൂരിൽ എയിംസ് വീണ്ടും ചർച്ചയായിരിക്കുകയാണ്. .