പ്രാർഥന നിറവേറി; ലിനിയുടെ മകന് പറശ്ശിനിക്കടവിൽ ചോറൂണ്

തളിപ്പറമ്പ്: രോഗികളെ ശുശ്രൂഷിക്കുന്നതിനിടെ നിപ വൈറസ് പിടിപെട്ട് മരിച്ച ലിനിയുടെ പ്രാർഥനയുമായി കുടുംബം ഞായറാഴ്ച പറശ്ശിനിക്കടവ് മുത്തപ്പൻ ക്ഷേത്രത്തിലെത്തി. ഇളയമകൻ സിദ്ധാർഥന്റെ ചോറൂൺ മുത്തപ്പൻ സന്നിധിയിൽ വേണമെന്നായിരുന്നു പ്രാർഥന.

 ലിനി ആസ്പത്രിയിലുള്ളപ്പോഴായിരുന്നു നേർച്ച.ആ അമ്മയുടെ സാന്നിധ്യമില്ലാതെ മുത്തപ്പനു മുന്നിൽ ചോറൂണും തുലാഭാരവും നടത്തി. പിതാവ് സജീഷിന്റെ മടിയിലിരുന്നാണ് സിദ്ധാർഥ്‌ അമ്മയുടെ ആഗ്രഹം നിറവേറ്റിയത്. ലിനിയുടെ മൂത്തമകൻ ഋതുൽ, അമ്മ രാധ, സഹോദരി ലിജി എന്നിവരും കൂടെയുണ്ടായിരുന്നു. ധർമശാല വൈസ്‌മെൻ ക്ലബ്ബ് വൈകീട്ട് സംഘടിപ്പിച്ച ആദരിക്കൽ ചടങ്ങിലും പങ്കെടുത്തു.